Alexis Viéitez consegue un novo coche e apunta á Subida A Pontenova
Por Diego Espiño
A luz empeza a asomar ao final do túnel para Alexis Viéitez, actual campión galego de montaña que o pasado 8 de xuño perdeu os seus dous vehículos e gran parte do seu material de competición no incendio do tráiler do seu equipo.
O piloto da Escudería Buxa Motor perdeu a Subida a Dumbría e viu perigar o seu futuro deportivo inmediato, pero tras moitos esforzos está a conseguir saír á boia.
Grazas ao apoio recibido con varias achegas na conta bancaria aberta para axudarlles e tamén grazas ao diñeiro conseguido coa venda de varios vehículos, entre eles un Legend Car preparado para montaña e gañador do campionato autonómico na categoría SCC, o equipo Viéitez Motor anunciou a adquisición dun novo coche de competición.
Trátase de Fórmula Dicode de Jesús Pombo, con quen se chegou a un acordo facilitando os pagos necesarios.
"Quero dar as grazas publicamente a Jesús Pombo porque sabe que neste momento despois dos gastos que tivemos para empezar a tempada con dous coches era complicado afrontar o pago doutro coche e todo o necesario para facer unha carreira", explicou a través das redes sociais do equipo Vicente Viéitez.
"Jesús o primeiro que me dixo foi colles o coche e todos os repostos e lévalo, tráesme o diñeiro que poidas e xa iremos facendo contas", revelou o pai do piloto.
Desta forma Alexis, que esta tempada gañara as probas de Marín e Oia e sumara un segundo posto na Saleta, ten previsto reengancharse ao Campionato Galego de Montaña os próximos 6 e 7 de xullo na Subida A Pontenova co obxectivo de pelexar polo que sería o seu cuarto título.
Relacionadas:
-
O título de campión galego de rally de montaña xa leva o nome de Alexis Vieitez
Por Redacción |
-
Alexis Vieitez impón a súa lei en Ponte Caldelas
Por Manu Otero |
-
A Subida a Ponte Caldelas chega á súa cuarta edición consolidada no calendario
Por Redacción |
-
A Subida a Pontevedra repite percorrido pola beira do Almofrei
Por Manu Otero |
-
O motor galego únese en apoio de Alexis Viéitez tras o incendio dos seus coches de competición
Por Diego Espiño |
-
Un incendio calcina un tráiler con dous vehículos de competición dentro en Cerdedo-Cotobade
Por Natalia Puga |