O primeiro partido da segunda volta de competición na Segunda RFEF levará o Pontevedra Club de Fútbol o vindeiro domingo 23 de xaneiro (17.00 horas) a Santiago de Compostela, un encontro no que o club granate non estará só.

Aos esperados desprazamentos de seguidores en coches particulares súmase a viaxe organizada que anunciou este xoves a entidade de Pasarón.

Trátase dun desprazamento en autocar sufragado pola empresa San Marcos, polo que o transporte será de balde para os afeccionados e só será necesario abonar o custo das entradas para ver o partido no Estadio Vero Boquete fronte á SD Compostela.

Granate, acompaña ao equipo no partido ante a @SD_Compostela! Reserva a túa praza nas oficinas de Pasarón(luns-venres de 09.00 a 14.00 e 16.00 a 19.00) abonando só o prezo da entrada e viaxa gratis a Santiago no autobús fletado polo noso colaborador San Marcos.#TAG #HaiQueRoelo pic.twitter.com/4oNoRNVuUn

— Pontevedra CF (@PontevedraCFSAD) January 13, 2022

Estas entradas fixáronse en 15 euros para o público adulto e en 5 euros para os menores de idade.

O autocar ten previsto partir desde o Pavillón Municipal dos Deportes ás 15.00 horas para regresar tras o encontro, sendo necesario reservar praza nas oficinas do Pontevedra, no Estadio Municipal de Pasarón.