Á recente renovación do capitán do Pontevedra Club de Fútbol, Álex González, hai que sumar un novo movemento nas filas do equipo de Rubén Domínguez.
Trátase da incorporación do atacante de 26 anos Domingo Mba, un xogador de perfil ofensivo que chega procedente do CD Coria, equipo no que fixo 9 goles e 3 asistencias na tempada do ascenso a Primeira Federación.
O internacional con Guinea Ecuatorial chega á Boa Vila para achegar máis pólvora a un ataque que foi reforzado nas últimas horas coa fichaxe de Iñaki Elejalde.
Do mesmo xeito que o atacante madrileño, Domingo cumpre á perfección co perfil predilecto do técnico Rubén Domínguez, pois é un xogador polivalente capaz de desempeñarse en todas as posicións da fronte de ataque.
Con gañas de verte debutar en Pasarón, Domingo 🫡🍿#OndeOLerezFaiHistoria pic.twitter.com/rAJS7Sk4fM
— Pontevedra CF 🦴 (@PontevedraCFSAD) July 9, 2026
O seu lugar máis natural no campo reside na banda dereita e, entre as súas principais virtudes, o guineano destaca pola súa gran potencia física e unha gran verticalidade acompañada polo seu bo facer no un contra un.
Esta é a sexta incorporación dun Pontevedra que abriu a veda de fichaxes o pasado sábado coas incorporacións de Jerín Ramos, Adrián Argos e Ilías Charid.
As novas non cesaron no arranque da semana co anuncio do centrocampista Iker Ivorra e o xa mencionado fichaxe de Elejalde.
Desde entón, a entidade lerezana mantén un ritmo de traballo constante na confección dun plantel que, aos poucos, comeza a sumar efectivos.
Engade Pontevedra Viva como fonte preferida de Google de balde
Mantente informado coas últimas noticias de actualidade.