Tríatlon e Pontevedra volveron ir da man en 2025 cun gran evento internacional.
Por segunda vez na súa historia a Boa Vila foi a sede dos Campionatos do Mundo Multideporte (Multisport), un evento que concentraba os mundiais de tríatlon de longa distancia, dúatlon, acuatlón, aquabike, dúatlon cros e tríatlon cros.
Entre o 20 e o 29 de xuño competiron en Pontevedra finalmente 3.250 deportistas de 44 países diferentes e de todas as idades, chegando con eles máis de 7.000 acompañantes.
Máis dunha semana de emoción e deporte a partes iguais que supuxo, segundo un estudo realizado, "un impacto económico na provincia, na comarca, de case 22 millóns de euros (21.716.764 euros)", confirmou o presidente da Federación Española de Tríatlon, José Hidalgo.
"Pontevedra volveuse a superar. A posta en escena é inigualable. Hoxe Pontevedra vale máis que onte", chegou a afirmar tras a cita o director técnico da Federación Española, Jorge García.
Logrouse segundo o alcalde, Miguel Anxo Fernández Lores, unha "valoración fantástica en todos os sentidos. Éxito de organización, deportivo, e de proxección da cidade e das Rías Baixas, da provincia e de Galicia".
As cifras do Multisport deixan ás claras a magnitude do evento organizado, e é que durante a súa celebración colocáronse 5.200 valos, 1.000 conos, 40.000 metros de cinta de balizamento, 175 metros cadrados de pantallas LED, usáronse 21.000 botellas de auga, 14.000 pezas de froita, 30.000 vasos reutilizables e máis de 8.000 xeles e barritas enerxéticas.
Implicáronse ademais 1.300 persoas directamente, con 462 voluntarios do programa Ofivol, 210 militares, 116 empregados públicos e 67 membros do staff de operacións durante os dez días de competición.
Todo iso cunha importante programación paralela e logrando o selo 'Gold' pola súa aposta pola sustentabilidade.
O Multisport de 2025 foi o cuarto evento do máximo nivel internacional organizado en Pontevedra tras o Mundial de Dúatlon de 2014, o propio Multisport de 2019 e a Gran Final das Series Mundiais de 2023. Pero a historia da Boa Vila con este deporte non se detén, xa que en 2026 repetirá como sede da Gran Final das Series Mundiais, a maior competición das organizadas anualmente pola Federación Internacional (World Triathlon).
