Ultimátum dun mes ao Grupo Lar para que finalice a urbanización dos terreos de Tafisa
Por Alejandro Espiño
Un mes, a contar a partir da notificación a empresa. ÿ o prazo que o Concello de Pontevedra dá a Grupo Lar, propietario dos antigos terreos de Tafisa, para completar os traballos de urbanización de todo este ámbito, de forma que poida ser recepcionada dunha vez polo goberno municipal. Así se recolle na providencia asinada este luns polo concelleiro de Urbanismo, Antón Louro.
En concreto, os traballos pendentes son a creación dunha senda peonil, o derrubamento da antiga nave de carpintaría e a creación dunha zona verde na parcela situada entre Camiño Vello de Castela, José Malvar e o Centro Galego de Tecnificación Deportiva. Ademais, deberán resolver as deficiencias de execución detectadas polos técnicos municipais na súa última revisión a todo este proxecto.
Antón Louro advirte de que se a empresa incumpre esta directriz, se lles abrirá un expediente de disciplina urbanística e un procedemento sancionador por "incumprimento das súas obrigas".
Todo iso, dixo, sen prexuízo de que se poidan adoptar outras medidas ante o desinterese mostrado pola compañía ante a súa obriga de cumprir coas debidas condicións de seguridade, hixiene ou ornato público en todo este ámbito, que como recordou o edil socialista, ata que sexa recepcionada polo Concello, son responsabilidade "inexcusable" da empresa "que debe mantela en perfecto estado de revista".
O concelleiro de Urbanismo espera que esta decisión sirva para encamiñar "definitivamente" esta cuestión. Recordou que as obras comezaron en novembro de 2010 e tiñan un prazo de execución de catorce meses. Explicou que o goberno municipal foi "flexible", ao entender que a situación económica impedía ás empresas construtoras cumprir os seus compromisos; pero asegura que tiveron tempo abondo para cumprir coas súas obrigas.
O Concello de Pontevedra espera que pronto estean dispoñibles para os cidadáns os novos espazos que proporcionará esta unidade de actuación, entre elas un parque infantil ou varias zonas verdes. Ademais, permitiría aproveitar as parcelas para a construción de novos equipamentos. Neste sentido, avanzou que un proxecto "importante" para a cidade se tería interesado por instalarse nestes terreos.
Relacionadas:
-
Hai oco no mercado hoteleiro pontevedrés para un "cinco estrelas"?
Por Oskar Viéitez |
-
Amplían en 15 días hábiles o prazo para que Lar entregue a urbanización de Tafisa
Por Oskar Viéitez |
-
O Grupo Lar dá impulso á urbanización de Tafisa, que deberá rematar o 28 de febreiro
Por Redacción |
-
O Grupo Lar necesita máis tempo para acondicionar a urbanización de Tafisa
Por Redacción | Creada e actualizada
-
Novo interese da propietaria dos antigos terreos de Tafisa polo seu aproveitamento urbanístico
Por Alejandro Espiño |
-
Moreira pon a Tafisa de exemplo do "desastroso fracaso" das operacións urbanísticas de Lores
Por Alejandro Espiño |
-
O grupo Lar vese incapaz de sacar adiante o proxecto inmobiliario de Tafisa
Por Oskar Viéitez |