Este xoves constituíuse na Delegación Territorial da Xunta en Pontevedra a comisión de seguimento do Pacto Ambiental asinado con Ence. O acto contou coa participación do vicepresidente da Xunta en funcións, Alfonso Rueda, a conselleira de Medio Ambiente e Ordenación do Territorio en funcións, Beatriz Mato, e o conselleiro delegado de Ence, Ignacio de Colmenares e Brunet, ademais doutros representantes da empresa pasteira e da administración autonómica.

Entre outros obxectivos, a comisión de seguimento determinará o destino dos 3 millóns de euros que Ence comprometeu no seu programa social na cidade de Pontevedra e a súa comarca. E dicir, 180 millóns a fins sociais durante os sesenta anos que dura a prórroga da concesión dos terreos de Lourizán onde se sitúa a fábrica.

Ence convidou aos concellos de Marín, Poio e Pontevedra, e á Deputación, a integrarse nesta comisión con carácter permanente que colaborará na elaboración do programa social de Ence, así como no seguimento das actividades que se poñerán en marcha. Tan só o goberno local de Marín respondeu positivamente a esta invitación, mostrando o seu rexeitamento a esta iniciativa os concellos de Pontevedra e Poio.

Segundo explicou o conselleiro delegado de Ence, esta negativa "no perjudicará" aos colectivos sociais destes municipios. 

De acordo á visión de Ence, a participación das administracións públicas co seu coñecemento da realidade social da comarca fará que resulten máis eficientes para a sociedade os recursos achegados pola empresa para o desenvolvemento económico-social de Pontevedra.

Colmenares explicou que "nosotros somos una compañía industrial, no somos una ONG, o sea no estamos acostumbrados a gastar tres millones de euros todos los años en ese tipo de cosas" por este motivo a invitación aos concellos para participar nesta comisión responde á idea de que "es bueno que haya más de un colectivo diciéndonos donde es mejor" destinar o diñeiro "si hay más voces es más interesante", engadiu "pero perjudicar, no".

O pacto ambiental asinado o pasado 30 de xuño pola Xunta de Galicia e Ence, recolle a implementación do mencionado programa social para a "concesión de axudas, bolsas, contratos e outros métodos de financiamento necesarios para a realización de proxectos, estudos, investigacións e outros traballos da mesma índole".

PAZO DE LOURIZÁN

O pacto ambiental tamén inclúe outras actuacións fundamentais: o financiamento con 15 millóns de euros para a nova depuradora de Pontevedra, os 30 millóns de investimento que a fábrica asegura que se dedicarán a mellorar a eficiencia do complexo industrial, a construción dunha planta de coxeneración de biomasa, e a achega de cinco millóns de euros para converter o Pazo de Lourizán nun centro de referencia en investigación forestal. 

Sobre este último proxecto, Ence quere instalar na histórica residencia de Montero Ríos un centro privado de I+D+i. O Pazo é propiedade da Deputación, aínda que o seu uso está cedido á Xunta a quen lle corresponde o seu mantemento e conservación. Tanto a administración provincial como o Concello de Pontevedra xa mostraron o seu receo a que a empresa se instale no emblemático edificio.

Neste sentido, Alfonso Rueda comentou que "eu lamentaría moitísimo que non se puidese facer este investimento" pero xa advertiu a Ignacio de Colmenares "como queremos que se faga o que lle pedimos a Ence é que vaia buscando un emprazamento alternativo".

E engadiu o vicepresidente da Xunta respecto da Deputación de Pontevedra que "se o problema é que hai que facer unha solicitude formal para ver cal é a disposición, farémola sen ningún problema". 

Finalmente Rueda criticou á presidenta da Deputación, Carmela Silva, porque "adoita manifestarse co non respecto ás propostas que recibe". Por iso o vicepresidente galego expresou o desexo de que "espero que esta vez non faga así" e que os cidadáns de Pontevedra "non se perdan está oportunidade de facelo no Pazo de Lourizán".