Pontevedra, invitada ao foro de alcaldes e ministros da OCDE: "É un orgullo", afirma Lores
Por Alejandro Espiño
Pontevedra está ante a que, probablemente, sexa a cita "máis importante" á que asistiu desde que comezou o seu proceso de "revolución urbana". Así describen desde o goberno municipal a invitación que o Concello recibiu por parte da Organización para a Cooperación e o Desenvolvemento Económicos (OCDE).
Este organismo internacional, fundado en 1961, promove políticas que melloren o benestar económico e social da poboación mundial. De forma periódica, ofrecen un foro onde os gobernos poidan traballar conxuntamente para compartir experiencias e analizar os cambios que se producen desde o punto de vista económico, social ou ambiental.
No caso de Pontevedra, a OCDE desexa que participe nun foro de debate con alcaldes e ministros de todo o mundo, que se celebrará os días 18 e 19 de marzo en Atenas, no que se analizarán os problemas urbanos e como alcanzar un crecemento inclusivo nas cidades.
"É un orgullo", explicou o alcalde de Pontevedra, Miguel Anxo Fernández Lores, que celebrou que a Boa Vila converteuse nun "referente mundial" polo seu modelo urbano. Iso si, recoñeceu que este convite xéralle "certa tensión" ante o reto de deixar o "pavillón alto" e cumprir coas "expectativas" polas que chamaron á cidade.
Para Fernández Lores que a OCDE recorra a Pontevedra para falar de transformacións urbanas e mobilidade amable é un "chanzo máis" na proxección e o posicionamento internacional da cidade. "Como alcalde é unha satisfacción que se fixen en nós", dixo.
O alcalde, acompañado da concelleira de Promoción económica, Anabel Gulías, destacou ademais que a OCDE adoita realizar estudos e informes sobre o contido destes encontros, publicacións que son "referente" a nivel educativo, político e social e nos que aparecerá Pontevedra.
En concreto, o organismo quere que Pontevedra participe o día 19 nun plenario, ao que se asiste só por invitación, sobre "políticas que contribúen a resolver problemas urbanos", unha cita na que debaterán alcaldes e ministros dos países máis desenvoltos do mundo.
Ademais, Fernández Lores participará a xornada previa, o luns 18, no cuarto encontro do que a OCDE chamou os "Champions Majors" (alcaldes campións), que preside a alcaldesa de París, Anne Hidalgo, que busca abordar a "crecente preocupación" que existe para lograr cidades cunha maior cohesión social e menos desigualdades.
A loita contra o cambio climático, o crecemento sustentable das cidades ou o aumento na calidade de vida dos habitantes das urbes serán outros dos asuntos que se analizarán neste encontro que acollerá a capital grega.
Relacionadas:
-
Lores alerta ante o plenario dos Champion Mayors da OCDE do peligro crecente da contaminación das cidades
Por Redacción |
-
Lores chama en Madrid a converter as cidades en espazos máis amables para a xente
Por Redacción |
-
O xornal italiano La Repubblica descobre Pontevedra, a "cidade sen coches"
Por Alejandro Espiño |
-
Alcaldes cataláns visitan Pontevedra para coñecer a súa transformación urbana
Por Redacción |
-
Lores, a través da rede Cidades que Camiñan, reunirase con Pere Navarro, director de Tráfico
Por Alejandro Espiño |
-
Stuttgart, Ámsterdam e Dublín miran cara o modelo urbano de Pontevedra
Por Alejandro Espiño |
-
2018, o ano do 'boom' mediático da transformación urbana de Pontevedra
Por Alejandro Espiño |
-
Pontevedra ten "un gran porvenir", segundo Joan Busquets, porque ofrece "calidad de vida"
Por Alejandro Espiño |
-
París quere "sabelo todo" de Pontevedra: "Se podo irei", asegura a alcaldesa
Por Alejandro Espiño |