Pontevedra terá un "poboado de Nadal" na Ferrería cun mercado típico de Nadal
Por Alejandro Espiño
Quince casetas integrarán o "poboado de Nadal" que Pontevedra instalará na Praza da Ferrería. Será un lugar no que, seguindo o ronsel dos tradicionais mercados do Nadal, poderanse adquirir todo tipo de produtos típicos destas festas.
Esta será unha das grandes novidades da programación "intensa e segura" que o Concello preparou para contribuír a que en Nadal os pontevedreses "sexan un pouco máis felices", segundo destacou a concelleira de Festas, Carme da Silva.
Este mercado abrirá as súas portas o 17 de decembro, coincidindo co inicio das vacacións escolares. Case todos os postos serán do comercio local pontevedrés e neles, entre outras cousas, poderanse atopar adornos do Nadal, xoguetes ou postais:
Ademais, diferentes panaderías e pastelerías da cidade ofrecerán tamén produtos gastronómicos típicos destas festas.
Da Silva explicou que para evitar aglomeracións e cumprir as restricións pola covid-19 haberá control de aforo no mercado e medidas hixiénicas.
A programación do Nadal araincará xa o 10 de decembro cos primeiros pases das nove compañías de Pontevedra que ofrecerán unha trintena de espectáculos de música, animación, circo ou maxia. Serán itinerantes e ao aire libre para que non haxa aglomeracións.
Estes espectáculos, que chegarán tamén a barrios como A Parda, O Burgo ou Monte Porreiro, estarán protagonizados polas charangas OT e MIL9, Pablo Méndez, Troula, Barafunda, A festa escénica, Nelson Quinteiro, Rivel e Armonium.
O Teatro Principal, pola súa banda, reunirá toda a oferta teatral para a infancia. Será con outros nove espectáculos de catro compañías pontevedresas, Baobab Teatro, Polo correo do vento, Pavís Pavós e Migallas Teatro. Todas elas ofrecerán sesións de mañá e tarde.
Pontevedra recibirá ademais a visita de Papá Noel, o Apalpador e os Reis Magos. Iso si, non haberá recepcións nin cabalgatas.
Melchor, Gaspar e Baltasar redobrarán a súa presenza no municipio e, ademais de percorrer as rúas da cidade, pasarán por todas as parroquias do rural. Será o día 5 de xaneiro, a partir das 10:30 horas. Estarán acompañados de nove grupos de animación.
ILUMINACIÓN E DECORACIÓN DO NADAL
Como estaba previsto, a iluminación do Nadal acenderase o vindeiro venres 4 de decembro, ás seis e media da tarde. Iso si, sen acto de inauguración. Acenderanse sen máis, ao mesmo tempo en toda a cidade, para que non se reúna moita xente.
Pero nos próximos días, avanzou Carme da Silva, haberá máis decoración. Así, os xardíns da Ferrería terá elementos especiais e instalarase un photocall de dous metros de alto na Praza de Ourense. Tamén haberá lugares para fotos ao redor da gran árbore de Nadal que estará na Ferrería.
O Pazo da Cultura estreará o día 10 de decembro unha iluminación "especial", segundo Da Silva, que irá cambiando durante as festas. O despregamento complétase coa tirolesa de 150 metros que estará situada en Raíña Vitoria, onde tamén se reforzará a decoración.
Relacionadas:
-
O poboado 'Tempo de Nadal' da Ferraría permanecerá aberto os días 24 e 31
Por Redacción |
-
Un mercado con sabor a Nadal
Por Redacción & Mónica Patxot |
-
O ciclo Nadal no Principal pon á venda as entradas para os seus nove espectáculos
Por Redacción |
-
O poboado de Nadal da Ferrería, a punto para abrir mañá a súas portas
Por Redacción |
-
Un photocall para dicir desde Pontevedra #MalaChispaTeComa2020
Por Redacción |
-
O Pazo provincial loce unha "carballeira máxica"
Por Redacción |
-
As luces festivas xa iluminan Pontevedra porque hai máis motivos que nunca para celebrar o Nadal
Por Mónica Patxot & Redacción |
-
Así é a postal de Nadal que propón Pontevedra
Por Alejandro Espiño |
-
Pontevedra súmase ao "bloqueo" a Amazon e pide mercar no comercio local
Por Alejandro Espiño |
-
A araucaria de 30 metros da Alameda volve iluminar o Nadal pontevedrés como hai tres décadas
Por Mónica Patxot & Redacción |
-
Pontevedra encenderá a iluminación de Nadal o próximo venres 4 de decembro
Por Alejandro Espiño |
-
Un aplauso para a estrela da árbore de Nadal da Ferrería, que achega un pouco máis as festas
Por Redacción & Cristina Saiz |