Caldas programa un mes de actividades ao redor do Día Internacional da Muller
Por Redacción
A concelleira de Igualdade de Caldas de Reis, Inés Fuentes, informaba este xoves da programación de actividades que se levarán a cabo durante todo o mes de marzo, ao redor da conmemoración do Día Internacional da Muller.
A concelleira destaca que "este ano pretendemos visibilizar as mulleres que se encontran na primeira liña da crise da COVID-19 como traballadoras da saúde, coidadoras, innovadoras e organizadoras comunitarias. Esta crise puxo de relevo a importancia da contribución das mulleres e as cargas desproporcionadas que soportan e o Concello de Caldas quere seguir fomentando a educación e a participación cidadá nesta loita".
Por unha parte, desenvolveranse unha serie de obradoiros de sensibilización sobre estereotipos de xénero na mocidade e de fomento da igualdade dirixidos ao alumnado de cuarto ou quinto de primaria dos centros educativos da vila termal: CPI Alfonso VII, CEIP San Clemente, CPR A Encarnación e CPR San Fermín. Durante tres sesións de 50 minutos cada unha traballarán temáticas como a identidade sexual e roles de xénero, as tarefas domésticas e a igualdade entre sexos. Os obradoiros serán conducidos por profesionais da materia, combinando material audiovisual, xogos e debates.
Por outra banda, o proxecto "8 de marzo: mulleres da vila" está centrado en 18 mulleres emprendedoras caldenses que a través dos seus negocios e establecementos comerciais dan vida ás rúas e ofrecen os seus servizos á cidade e á cidadanía. Unha serie de fotografías expostas nos seus escaparates e un vídeo contando as súas historias conformarán unha homenaxe a estas mulleres polo seu traballo e coraxe.
Todas estas actividades están subvencionadas pola Deputación de Pontevedra, a través do seu programa específico de fomento da igualdade de oportunidades e a prevención da violencia de xénero.
Así mesmo, o edificio consistorial ornamentarase durante o mes de marzo cunha alfombra de cor lila colocada no balcón principal, conmemorando a loita da muller pola súa participación en igualdade a do home.
Relacionadas:
-
O alumnado de Caldas aprende a combater o machismo nas redes co obradoiro "Youtube e xénero"
Por Redacción |
-
Caldas presenta a campaña 'Mulleres da vila', un recoñecemento ás traballadoras á fronte de negocios
Por Redacción |
-
O 8M en Bueu, unha "alerta" de que o mundo "pode volver atrás"
Por Redacción |
-
Ponte Caldelas, Campo Lameiro e Caldas de Reis conciencian contra a violencia de xénero
Por Oskar Viéitez |
-
Noventa comercios e entidades tinguirán Caldas de negro contra a violencia machista
Por Redacción |
-
Caldas organiza un ciclo de oito talleres para combater a violencia machista e fomentar o empoderamento da muller
Por Redacción |
-
250 troncos de cores nas prazas de Caldas para sensibilizar á poboación coa campaña 'Camiñando cara a igualdade'
Por Redacción |