Dous son os proxectos que están a estudar os técnicos municipais relacionados co proceso de recuperación ambiental da Xunqueira de Alba. Son os presentados pola Deputación dentro do proceso para a retirada do seu parque de maquinaria e da imprenta provincial.

Os terreos que ocupan ambos equipamentos, uns 17.600 metros cadrados, vanse a incorporar á actual xunqueira, creando unha zona de verde de maior extensión e calidade natural.

Así, segundo explicou o concelleiro de Urbanismo, Xaquín Moreda, o proxecto relativo ao parque de maquinaria consiste na demolición das construcións existentes así como da rexeneración de todo o terreo. O orzamento é de algo máis dun millón de euros.

Moreda sinalou que esta actuación "non é sinxela" xa que neses terreos existen actualmente naves, zonas pavimentadas e unha planta de aglomerado.

Fronte a esta situación actual, o proxecto contempla a creación dunha pradaría con árbores autóctonas (sobreiras, salgueiros, abeleiras, acivros, carballos e freixos) ou a instalación de mobiliario urbano, entre eles bancos, papeleiras e fontes.

Ademais, crearase un camiño que conectará a rúa Martín Códax co paseo da Xunqueira.

Ao respecto dos terreos da imprenta provincial, tamén se recolle o derrube do edificio por un orzamento de 274.000 euros, para recuperar uns 2.980 metros cadrados.

Desde o Concello de Pontevedra celebran a "gran sensibilidade" amosada pola Deputación para tratar de devolver a Xunqueira de Alba ao seu estado natural.

A través da Alcaldía, o goberno municipal continuará solicitando tanto á Administración do Estado como á Xunta de Galicia a devolución dos terreos que ocupan ambos organismos para recuperalos para o lecer dos veciños e veciñas de Pontevedra.