A Deputación axudará aos concellos a adaptar as súas ordenanzas e implantar taxas que graven a xeración de residuos
Por Oskar Viéitez & Mónica Patxot
O vicepresidente da Deputación de Pontevedra, César Mosquera, mantivo este mércores unha reunión con representantes municipais de 50 concellos da provincia para falar do novo marco normativo dos residuos e as súas implicacións para os gobernos locais.
Mosquera advertiu que, ante o novo marco normativo, os concellos da provincia deberán corrixir as súas ordenanzas de residuos e implantar taxas que graven o pago por xeración.
Nesta xuntanza os representantes municipais trasladaron a súa preocupación polo cambio que xa está en marcha e que obrigan ás administracións locais, baixo ameaza de sanción, a cumprir os obxectivos de reciclaxe, tendo como primeira data 2025 para reciclar o 55% dos residuos.
César Mosquera subliñou que ningunha das novas normativas, nin a transposición da directiva europea, nin a nova lei estatal nin a autonómica prevén achegas económicas, senón que todas están baseadas no principio de "quen contamina paga", cargando a financiación do sistema nas taxas sobre os produtores dos residuos. De aí a necesidade de corrixir as ordenanzas municipais establecendo diferentes escalas nas taxas.
A nova lei insiste expresamente en que hai que aproximarse ao pago por xeración: quen máis residuos xera debe pagar máis.
Mosquera anunciou que a Deputación vai poñer axudas a disposición dos gobernos locais "que queiran cumprir cos obxectivos, coa normativa a legalidade, o planeta, o medio ambiente, e con todos os obxectivos que son irrenunciables".
O Plan Revitaliza, segundo sinalou o vicepresidente, vai conceder axudas económicas para realizar os investimentos necesarios, pero advertiu que se van realizar inspeccións para que realmente os cartos se destinen a obter resultados e cumprir os obxectivos de reciclaxe. Tamén axudará na redacción de novas ordenanzas municipais conforme á normativa, así como na xestión da obtención e transmisión de información sobre os residuos locais á Xunta.
Mosquera confirmou tamén que, fronte as eivas de recursos humanos dos concellos, a Deputación vai impulsar un servizo provincial de inspección e control de residuos para cumprir outra das esixencias da nova lei. A alternativa para os municipios, lembrou, é facer a inspección por si mesmos a través da Policía Local ou doutro persoal funcionario de carreira propio.
Co fin de concretar todas as iniciativas e facer unha valoración económica e de recursos humanos que a Deputación precisa para axudar aos concellos, os representantes municipais comprometéronse a concretar nos vindeiros días a súa adhesión á proposta provincial.
Relacionadas:
-
Dezaseis concellos da provincia participan na viaxe do Plan Revitaliza a Cataluña, País Vasco e Navarra
Por Redacción |
-
Os concellos do Plan Revitaliza están nas mellores condicións para cumprir coa nova Lei de Residuos
Por Oskar Viéitez |
-
A Deputación pon en marcha o corpo provincial de inspección de residuos
Por Oskar Viéitez & Mónica Patxot |
-
O corpo de control da Deputación inspeccionará os residuos de 22 concellos da provincia
Por Redacción |
-
Aprobados 3,5 millóns de euros do Plan Concellos en recursos que beneficiarán a 21 municipios da provincia
Por Oskar Viéitez |
-
A Deputación habilitará axudas para que os concellos poidan adaptarse á nova Lei de Residuos
Por Oskar Viéitez |
-
O novo contrato da xestión do lixo contemplará o residuo como un recurso e buscará reducir a pegada do CO2
Por Redacción |
-
A redución do canon de Sogama deste ano suporá un aforro para os galegos de máis de 11 millóns
Por Redacción |