A humanización da praza pública de Vilalonga comezará en setembro e custará uns 900.000 euros
Por Redacción
A mediados de setembro. É a data na que, segundo as estimacións do Concello de Sanxenxo, poderán comezar as obras de humanización da praza pública de Vilalonga. O proxecto foi adxudicado á empresa EC Casas, que o executará por uns 909.000 euros.
Esta actuación supoñerá a definitiva humanización da contorna, eliminando o tráfico rodado, aínda que mantendo o acceso de servizo ao campo de fútbol.
O espazo converterase nunha zona versátil con beirarrúas amplas no lado da praza e no oposto, e propoñerase a limitación da velocidade a 20 km/h no tramo da PO-505.
Para potenciar a zona infantil, suprimiranse as barreiras físicas existentes, así como a bancada perimetral, que prexudican o acceso á praza.
Pola contra, a zona central da bancada impulsarase a nivel de usabilidade, coa construción dunha pérgola de estrutura de aceiro galvanizado, cuxos piares seguirán a liña dos troncos de bidueiro, co obxectivo de habilitar a realización de eventos culturais e deportivos con sombra durante a tempada estival.
Con estas melloras, a praza incrementará o seu espazo útil, que pasará dos 4.011 metros cadrados actuais aos 5.280 metros cadrados, que se gañarán nas inmediacións da PO-505 e do campo de fútbol.
Tanto o palco como o bar serán reformados dentro do mesmo proxecto, co que se conseguirá que, no caso do bar, pase a dar servizo a toda a praza, máis aló do campo de fútbol, que atende actualmente de forma exclusiva.
No caso do campo, prevese tamén a mellora dos seus accesos, ademais da plantación de bidueiros que sirvan de barreira entre a estrada e a praza.
Desta forma, tras a obra, a praza incluirá tres necesidades: zona infantil, unha zona para realizar pequenos eventos e outra para eventos maiores.
EC Casas, ademais de executar a obra, comprométese a asumir unha garantía de 4 anos, período durante calquera deficiencia será reparada de maneira gratuíta para o Concello.
Relacionadas:
-
A humanización da praza pública de Vilalonga prevese que estea finalizada o próximo mes de marzo
Por Redacción |
-
Retirado o pavimento da praza de Vilalonga
Por Redacción |
-
Vilalonga sumará 70 novas prazas públicas de aparcamento
Por Redacción |
-
Os veciños de Vilalonga queren un centro de maiores, a conexión co polígono de Nantes e a humanización da rúa principal
Por Oskar Viéitez |
-
Vilalonga disporá dun edificio sociocultural no antigo colexio
Por Redacción |
-
Vilalonga gañará mil metros para a súa praza central e mellorará os espazos
Por Redacción |