Poio solicitará a transferencia do polígono de Fragamoreira
Por Oskar Viéitez
O Pleno do Concello de Poio aprobou este martes unha moción impulsada polo PSdeG-PSOE e Avante Poio, a través da cal se insta á Xunta de Galicia a que, a través do Instituto Galego de Vivenda e Solo, formalice a transferencia e as competencias do ámbito do polígono de Fragamoreira ao Concello.
Deste xeito, a Administración local poderá facer as xestións pertinentes co Estado para impulsar o desenvolvemento do parque empresarial, segundo sinalou o voceiro socialista Gregorio Agís que lembrou que o Concello conta co compromiso de Zona Franca para desenvolver Fragamoreira.
"Somos quen de conseguir que os obstáculos e as trabas que pon o Partido Popular non supoñan un impedimento para buscar solucións e impulsar proxectos históricos", dixo o voceiro socialista.
O candidato á Alcaldía de Poio polo PSdeG-PSOE acusou ao seu rival, o candidato do PP, Ángel Moldes de "enganar" a moitos veciños para que non vendesen os terreos e así "conseguiu o seu obxectivo: paralizar un proxecto de forma indefinida porque iso, aínda que non é bo para Poio, si o é para os seus intereses políticos. Sobre a súa conciencia recaerá o feito de que unha empresa como Froiz tivese que instalarse noutro concello, debido á ausencia de chan empresarial en Poio", criticou.
Pola súa banda, o Partido Popular solicitou a través dunha emenda que "se existe algunha administración con interese real no polígono de Fragamoreira presente a súa proposta formalmente ante a Xunta de Galicia", co fin de "evitar así que estes anuncios queden en meras proclamas electoralistas".
A concelleira do PP de Poio, Rocío Cochón, criticou durante a súa intervención ao candidato socialista, Gregorio Agís, "se esta proposta é tan boa, por que non se presentou antes?" e afirmou que o delegado do Estado no Consorcio Zona Franca tamén é o secretario xeral do PSOE nesta provincia, "e a mesma promesa e foto que fixo en Poio tamén a realizaron na Cañiza, Marín, Caldas, Cuntis, Vilagarcía... sempre acompañados de candidatos socialistas" e que en Poio "nin sequera convidaron ao alcalde, Luciano Sobral, ao anuncio".
Por último, Rocío Cochón afirmou que os populares abrazan calquera iniciativa que permita desenvolver o polígono de Fragamoreira, pero din que non van ser "cómplices de promesas electorais que enganen aos veciños".
Relacionadas:
-
A Xunta licitará este ano o instrumento de ordenación que permitirá impulsar o parque empresarial de Fragamoreira
Por Oskar Viéitez |
-
28M | Regades confirma en Poio que o polígono de Fragamoreira é unha prioridade para a Zona Franca
Por Redacción |
-
28M | "Xerar riqueza, benestar e calidade de vida", a aposta de Gregorio Agís para ser alcalde de Poio
Por Redacción |
-
O PSOE aposta pola recuperación da senda fluvial do Rego do Mouro
Por Redacción |
-
Unha pasarela que conecte Mollabao coa Puntada, proposta dos socialistas de Pontevedra e Poio
Por Oskar Viéitez |
-
Zona Franca ofrece un estudio técnico para impulsar a creación do polígono empresarial de Fragamoreira
Por Redacción |
-
Marga Caldas insta á Xunta a que "saque do caixón" o proxecto do Polígono de Fragamoreira
Por Redacción |
-
Instan á Xunta a que transfira as competencias do polígono de Fragamoreira ao Concello de Poio
Por Oskar Viéitez |