Denuncian a destrución de elementos prehistóricos balizados na zona de obras do parque eólico do monte Acibal
Por Redacción
O movemento veciñal 'Amil sen eólicos' denuncia novos danos no patrimonio do monte Acibal derivados das obras do polígono eólico en marcha na zona.
Tal e como denuncia o portavoz do colectivo, Lucas Andión, nesta ocasión, resultaron danados varios elementos prehistóricos que estaban balizados polos veciños e non se respectaron.
Segundo explica, a pasada fin de semana, os veciños de Amil, Xeve e Campo Lameiro notificaron a Patrimonio posibles novos elementos na zona de impacto directo dunha nova pista nas obras do polígono eólico.
Dado que o Seprona da Garda Civil non puido acudir no momento, comunicaron eses elementos por teléfono e correo electrónico e procederon a balizalos, para que o persoal de obra tivese precaución. Tamén o notificaron con xeolocalizacións e fotografías enviadas a Patrimonio.
O Seprona acudiu ao lugar noutro momento e, cando os axentes chegaron, comprobaron que os elementos xa non estaban. Os veciños sinalan que en ningún momento se presentou o responsable de control Arqueolóxico da obra e o responsable da obra declarou que eles "non teñen por que deterse ante ningún balizado que non saben quen puxo". Ante a pregunta de cal foi a postura do arqueólogo cos elementos balizados non se deu resposta algunha, segundo a información veciñal.
Entre os elementos atopados había un chozo, unha serie de pías con interconexións de clara manufactura humana e unha pedra con elementos antrópicos da que expertos opinan que precisaba un maior estudio, que xa non se poderá realizar de estar soterrada nos movementos de terra.
Tamén se notificaron varios petroglifos con múltiples das denominadas "coviñas", que varios expertos arqueólogos consultados polos veciños tras ver as fotos e vídeos do mesmo consideraron "moi claros" e que se atopaban no medio da pista que se acababa de limpar de maleza.
Eran, segundo os veciños, elementos moi similares aos Bens de Interese Cultural xa catalogados e que aparecen no informe da empresa, pero en mellor estado de conservación.
Todos estes elementos atopábanse sinalados e notificados polos veciños, e ao carón do sétimo tetrasquel que os veciños veñen de reportar nas inmediacións das obras. Con este, sería "a maior concentración deste tipo de gravado prehistórico pouco común de Galicia". Os poucos que existen atópanse en algunha das mellores mostras de arte rupestre da provincia de Pontevedra.
Para os veciños e veciñas, "o estado no que quedaron todos estes elementos non deixa lugar a dúbidas de que se decidiu eliminalos".
Xa pasou máis de un mes dende que os veciños reportaron o primeiro petroglifo no medio das obras, e xa son 40 os elementos reportados ás autoridades. Os veciños seguen a preguntarse "como se permite o avance e desfeita das obras sen un estudio serio da zona pese aos reportes a Patrimonio e Industria".
Relacionadas:
-
Multitudinaria mobilización en Amil "contra os gobernos e especuladores"
Por Redacción |
-
"Indignación" por un novo impacto dos proxectos eólicos no Monte Acibal, a desaparición da Pisada do Mouro
Por Redacción |
-
Amil Sen Eólicos denuncia o inicio de voaduras no Monte Acibal sen a revisión de Patrimonio e Augas de Galicia
Por Redacción |
-
Detectan petróglifos danados pola acción da maquinaria de construción do parque eólico do monte Acibal
Por Redacción |
-
Ofrecen a colaboración do Seprona para resolver o problema cunha manda de cans sen fogar en Campo Lameiro
Por Redacción |
-
A Real Academia de Belas Artes entende que o Monte Acibal non é "o máis indicado" para a instalación dun parque eólico
Por Redacción |
-
O BNG presenta alegacións ao proxecto do Parque Eólico "Ampliación Penizas"
Por Redacción |
-
Máis de 2.000 alegacións de residentes en Amil e Campo Lameiro ao Polígono Eólico Zudreiro
Por Redacción |
-
Veciños de Amil reportan oito novos casos de patrimonio en perigo polas obras do parque eólico no monte Acibal
Por Redacción |
-
Os veciños de Amil denuncian a destrucción de petroglifos nas obras do Parque Eólico Acibal
Por Redacción |
-
Descobren petróglifos sen catalogar nunha andaina pola zona de creación do futuro polígono eólico Acibal
Por Redacción |