Cun horizonte de dous anos. Así traballan desde a Universidade de Vigo para deseñar unha"solución global" para potenciar o campus de Pontevedra. O obxectivo, segundo o seu reitor Manuel Reigosa, é "planificar o futuro do campus para os próximos 20 anos".

"O que queremos é non equivocarnos. Que acertemos e non fagamos obras que despois non sirvan para nada", explicou Reigosa durante a súa visita á Facultade de Deseño, a última titulación en incorporarse á oferta académica universitaria.

Precisamente este novo grao, dalgunha maneira, é o que marca os prazos. A idea da universidade pasa porque durante os dous primeiros anos esta titulación impártanse en dúas das tres plantas que a Xunta de Galicia cedeulles no seu edificio de Benito Corbal.

Pero, segundo Reigosa, para o terceiro curso "teríamos que buscar unha solución ponte ou unha solución definitiva, dependendo de como se desenvolvan as distintas oportunidades que hai enriba da mesa" e que, recoñeceu, poderían non pasar por un edificio en Tafisa.

"Esa é unha das posibilidades que están abertas, pero hai máis", asegurou o reitor, que sostén que "faríamos mal se agora con tantas cuestións abertas dixéramos cal será a solución".

No futuro do campus pontevedrés haberá que ter en conta, ademais dos bos datos de matrículas, a posible incorporación dun novo grao como resultado das negociacións do novo mapa de titulacións, que se abrirá o próximo ano.

Con respecto á proposta para destinar o Hospital Provincial para fins universitarios, Reigosa asegura que "é obvio que é unha solución de futuro". Inicialmente será a sede da nova Facultade de Enfermería, que terá docencia nos tres campus.

"Non vai a haber prioridade para ningún", garantiu o reitor, que confía en que no equipo decanal desta facultade haxa membros de Pontevedra, Vigo e Ourense.

Pero a Universidade de Vigo estuda tamén que Fisioterapia poida mudarse ao Provincial, o que deixaría libre un edificio na Xunqueira, "e outras cuestións que están enriba da mesa" como a posibilidade de situar no inmoble hospitalario unha residencia universitaria.

Acertar nesta planificación, destacou Manuel Reigosa, "vai a significar que sexa un campus sostible e potente como xa o é" e que poida atraer talento doutras partes do mundo.