Os videoxogos pisarán con paso firme no Culturgal
Por Redacción
Tras anos no que os videoxogos tan só asomaran o nariz no Culturgal, a edición do 2019 dará moito máis protagonismo a un sector que está a revolucionar a creación cultural en Galicia.
A primeira xornada do Culturgal, que se celebrará este venres día 29, acollerá a celebración da I Xornada do Videoxogo, que pretende ser un espazo común no que se atopen entre si as empresas do sector e o público que consume este tipo de produtos culturais.
Será un foro aberto a todas as persoas interesadas, segundo traslada a organización, que apunta que no Recinto Feiral de Pontevedra haberá empresas e proxectos destacados que exporán o traballo ao redor do videoxogo en Galicia, ofrecendo postos na feira, demos e presentacións dirixidas a todas as idades.
Esta xornada, que comezará ás cinco e media da tarde, quere ser unha posta en común de experiencias e coñecemento relacionados coas últimas tendencias do sector desde unha perspectiva profesional e técnica.
Profesionais das diferentes áreas de traballo desta industria compartirán cos asistentes experiencias e coñecemento de utilidade sobre diferentes aspectos técnicos, empresariais e legais do desenvolvemento dos videoxogos.
A xornada, que abrirá Manuel Meijide, vicepresidente de Videoxogo.gal, e Jacobo Sutil, director da Agadic, incluirá unha mesa redonda sobre o estado do videoxogo galego ás portas do ano 2020 e a presentación de proxectos como The Waylanders, Minimundos, Sea Bubble, Proxectos da Universidade (Odal), Revista Morcego e MUVI.
Pola súa banda, na propia feira un grupo de empresas dedicadas ao videoxogo contará coa súa área expositiva. O público de Culturgal atopará un espazo de cultura interactiva con demos, presentación de proxectos, equipos de desenvolvemento e un convite a participar e probar produtos feitos en Galicia.
A programación do Culturgal incluirá ademais o sábado 30 e o domingo 1 obradoiros de robótica, o público poderá gozar dos simuladores de realidade virtual da compañía portuguesa WavefunctionVR e no Espazo de Arte Contemporánea estará XOIA, empresa dedicada tamén á realidade virtual e aumentada en proxectos expositivos e artísticos.
Relacionadas:
-
Battle royale na Peregrina
Por Manu Otero |
-
Pontevedra, primeira cidade galega en acoller a Global Game Jam
Por Boris Rodríguez Pintos |
-
Sábado de público multitudinario e actividade frenética en Culturgal
Por Diego Torrado & Redacción |
-
Caeuche un dente? Lévao ao Culturgal para colaborar coa investigación científica
Por Cristina Saiz & Anxo Lourido |
-
A violencia contra as mulleres tamén se denuncia no inicio do Culturgal a través dunha performance
Por Cristina Saiz & Anxo Lourido |
-
O Culturgal abre as súas portas no Pazo da Cultura coa intención de superar os 15.000 visitantes
Por Cristina Saiz & Anxo Lourido |
-
'Eroski Paraíso', prato forte da proposta audiovisual do Culturgal nun día cargado de cinema
Por Enrique Morales |
-
Culturgal 2019 preséntase como o refuxio "onde nunca chove" con espectáculos, videoxogos e arte contemporánea
Por Redacción |
-
Culturgal acollerá a preestrea de Eroski Paraíso
Por Redacción |
-
O público do Culturgal premia un festival multidisciplinar que se celebra no Courel
Por Redacción |