O piragüismo pontevedrés busca o seu último baño de ouro da tempada no mundial de Hungría
Por Manu Otero
A tempada 2022 no piragüismo toca ao seu fin. O campionato do mundo júnior e sub 23 que esta semana se celebra na cidade húngara de Szeged poñerá o broche de ouro a unha campaña chea de éxitos para os padeeiros pontevedreses, que tratarán de ampliar aínda máis o seu palmarés e seguir cargándose de motivos para encarar o próximo ano, no que estará en xogo os pases para París 2024, coa confianza disparada.
A competición arranca este mesmo mércores coa cememonia de inauguración e as primeiras series clasificatorias.
Os xuvenís Iago García e Mauro Domínguez (Piragüismo Verducido) foron os primeiros representantes da armada galega en remar, fixérono á primeira hora da mañá no K4-500 xunto ao asturiano Rubén García e o sevillano Carlos Ruiz. Acabaron como primeiros da súa serie e segundos no cómputo xeral.
Ademais, Domínguez competirá tamén este xoves, xunto a Carlos Ruiz no K2-500.
Unha das parellas máis en forma do panorama nacional e internacional, os irmáns Noel e Diego Domínguez, está inscrita nas modalidades do C2-1000 e C2-500. No 'heat' da carreira curta, os irmáns sub 23 acabaron segundos na súa serie, pero cuartos no cómputo xeral. Así mesmo, o maior da saga, Noel, participará tamén no C1-500.
Outra pontevedresa que xa debutou nesta cita mundial é Claudia Couto. Xunto á súa compañeira sevillana Julia Espinosa, a padeeira sub 23 do EP Ciudad de Pontevedra nunca chegou a sentirse cómoda na sesión clasificatoria e acabaron quintas na súa serie, só por diante doutras dúas embarcacións, a checa e a estadunidense, que abandonou. Aínda así, Couto terá unha segunda oportunidade na modalidade de C1-500.
Outro barco que parte con opcións de medalla é o K4-500 sub 23 do que forma parte a pontevedresa Carolina García. Xunto ás súas compañeiras Lara Feijoo, Bárbara Pardo e Aida Bouza completaron a súa primeira serie en terceira posición, cuartas no cómputo xeral. García completará a súa participación no K2-500 con Bárbara Pardo como parella.
A xuvenil do Piragüismo Poio, Valeria Oliveira, debutará na cita mundial este xoves coa súa participación no C1-500 e no C1-200.
As primeiras finais comezarán a disputarse o venres. Xornada nas que iniciarán o seu concurso Manuel Fontán no C1-500 e Antía Jácome, actual campioa de Europa en categoría absoluta, no C1-200.
Na xornada do sábado loitará por un posto no podio o C4-500 sub 23 que traballa a diario no Centro Galego de Tecnificación Deportiva de Pontevedra e que forman David Barreiro, Manuel Fontán, Martín Jácome e o sevillano Cayetano García.
Alba Rodríguez, xuvenil do Piragüismo Poio, participará tamén na proba do C4-500, mentres que o último en entrar en liza será Joaquín Iglesias, do Piragüismo Verducido, que o fará na final do K1 sub 23 prevista para as 14 horas do domingo.
Relacionadas:
-
Dobrete de ouro mundialista para Antía Jácome: en C1 200 e en C2 500 con Diego Domínguez
Por Almu Dapena | Creada e actualizada
-
Baño de bronce para os irmáns Domínguez na final mundialista de 1000 metros
Por Redacción |
-
Medalla de prata para os irmáns Domínguez en C2 500 e pase directo á final do C1 200 para Antía Jácome no Mundial de Hungría
Por Redacción |
-
Teresa Portela e Adrián Sieiro reman cara a París cargados de medallas
Por Manu Otero |
-
Antía Jácome e Adrián Sieiro, medalla de ouro no Europeo de Munich
Por Almu Dapena |
-
Mellor tempo e pase directo á final do Europeo para Antía Jácome no C-1 200 metros
Por Diego Espiño |
-
Adrián Sieiro e Manuel Fontán, campións do Mundo no C-4 500 con Pablo Graña e Joan Antoni Moreno
Por Almu Dapena |
-
Teresa Portela e Carolina García, directas á final mundialista no K-4 500
Por Diego Espiño | Creada e actualizada