Ás 15.30 horas deste martes rexistrábase un accidente de tráfico en Quintáns, na parroquia cambadesa de Castrelo.
A persoa que conducía o vehículo provocaba danos en dous postes da luz coa derriba da instalación.
Ata o lugar desprazábase o servizo de Emerxencias do Concello de Cambados e unha patrulla da Garda Civil de Tráfico.
Malia o impacto, ningunha persoa resultou ferida, segundo informan os servizos de Emerxencias que acudiron ao lugar.
OUTROS DOUS ACCIDENTES NO SALNÉS
Si foi necesario trasladar á condutora do turismo que sufría un accidente de tráfico na autovía AG-41 no municipio de Meaño, tamén na comarca do Salnés.
O suceso producíase ao redor das 09.50 horas e a muller foi evacuada ao Hospital Montecelo con dor cervical e torácica.
Ademais do servizo de Emerxencias de Cambados, tamén interviña a Garda Civil de Tráfico, unha ambulancia do 061 e mantemento de estradas.
Un terceiro accidente na mesma comarca sucedía ás 08.00 horas na EP-9002 ao seu paso por Modia, en Cambados.
Neste caso, as persoas implicadas non precisaron asistencia sanitaria.