O BNG de Pontevedra cre que este mandato "probablemente vaia a moción de censura"
Por Oskar Viéitez & Cristina Saiz
O Pleno do Concello de Pontevedra celebrado este luns deixou patente a debilidade na que se atopa o Goberno local do BNG que viu como a pinza formada polos dous grupos da oposición, Partido Popular e Partido Socialista, impuxo algunhas medidas fronte ás que os nacionalistas están radicalmente en contra como son a reapertura ao tráfico da avenida Reina Vitoria ou a substitución dos lombos nas vías sanitarias.
Con todo, o PSOE votou a favor e o PP en contra da modificación de crédito próxima aos 7 millóns de euros que se fará con cargo aos remanentes de tesourería.
"Imos ter un mandato entretido, esperemos que divertido", apuntou o concelleiro nacionalista, César Mosquera que asegurou que con esta actitude "o PSOE ten decidido non facer un goberno de coalición" polo que aventurou que este mandato "probablemente vaia a moción de censura".
O portavoz do grupo municipal socialista, Iván Puentes, rexeitou que aspire a "converter nunha relación de Pimpinela" os plenos, as negociacións co Bloque, "nin o futuro goberno de coalición se se dese o caso".
Iván Puentes criticou que, desde que o PSOE "con toda a xenerosidade do mundo" apoiou a investidura de Miguel Anxo Fernández Lores como alcalde de Pontevedra, o goberno local do BNG dedicouse a "poñerlle fin a practicamente todas as iniciativas que o Partido Socialista desenvolveu nas súas concellerías nos últimos anos" en referencia aos proxectos da estratexia Pontevedra Flúe ou á retirada da feira da Alameda, entre outras iniciativas.
Ademais Puentes censurou a "violencia verbal" que, ao seu xuízo, mostrou Mosquera coa súa intervención e con respecto ás negociacións cos nacionalistas para formar goberno, Iván Puentes dixo que "por nós, evidentemente seguen abertas, pero se o BNG quere poñerlle fin que nolo comunique directamente" á vez que advertiu de que, se non hai pacto "faremos o que se fixo neste pleno, garantir a gobernabilidade e chegar a entendementos para sacar adiante aqueles temas que consideramos oportunos e discrepar do grupo de goberno naquelas cuestións nas que non estamos de acordo".
O portavoz do grupo municipal do Partido Popular, Rafa Domínguez animou ao PSOE a "que esta posición que traen aquí al pleno de Pontevedra, entren o no entren en el gobierno, la mantengan"
No que si coincidiron os concelleiros do PP e os do BNG foi en rexeitar a proposta dos socialistas na que instaban a contratar con urxencia a redacción dos proxectos de execución da estratexia Pontevedra flúe "para evitar que a cidade perda o investimento de 25 millóns de euros".
Populares e nacionalistas lembraron que non existe ningún compromiso asinado de investimento na cidade por parte do Goberno de España e que isto é un "Pontevedra bluf" e que o Concello non pode contratar ningunha obra en terreos nos que non ten a titularidade.
Seguindo o desenvolvemento da sesión plenaria estaban no patio de butacas do Teatro Principal a habitual representación dos traballadores municipais que reclama unha serie de melloras laborais e tamén unha decena de vendedores ambulantes que esixen que a feira se instale definitivamente na Alameda.
O alcalde chamou a atención a un dos portavoces dos ambulantes, José Luis Muíños que interrompeu constantemente o pleno con insultos dirixidos ao rexedor e ao concelleiro César Mosquera. "Estás chocho, Miguel", "Xa está senil" ou "Franquistas" gritaron os ambulantes.
Esta polémica do traslado da feira ocupou parte dos rogos e preguntas, quenda na que a concelleira socialista Yoya Blanco pediu explicacións sobre o motivo polo que non se contemplou Campolongo como localización alternativa á Alameda; tamén quixo saber por que non se convocou á Mesa do Comercio para opinar sobre este traslado; como se vai a compatibilizar a celebración da feira na avenida de Buenos Aires coa final das Series Mundiais de Tríatlon, ou por que non houbo feira o pasado sábado na Alameda se non había ningún evento.
O único momento sosegado do pleno foi a toma de posesión de Aroa Otero como nova concelleira do PP en substitución de Pablo Fernández.
Relacionadas:
-
Lores sostén que "non ten sentido" negociar co PSOE porque "ten decidido non entrar no Goberno"
Por Natalia Puga |
-
Rafa Domínguez augura un novo pacto de goberno entre BNG e PSOE que será "negativo" para a cidade
Por Redacción |
-
Eva Vilaverde, alcaldesa en funcións, sobre a proposta do PSOE: "A man tendida a negociar parece man aberta para dar"
Por Anxo Lourido & Cristina Saiz |
-
Nova "pinza": ao PSOE parécelle "fantástico" o pacto que ofrece o PP para fixar a Alameda como localización definitiva para a feira
Por Oskar Viéitez |
-
O BNG cre que non haberá pacto de goberno e o PP descarta unha moción de censura, "en estos momentos"
Por Oskar Viéitez |
-
Eva Vilaverde asegura que "mentres o BNG siga no Goberno a rúa Raíña Vitoria permanecerá pechada"
Por Oskar Viéitez |
-
O Pleno aproba a reapertura ao tráfico de Raíña Vitoria e a substitución dos lombos nas vías sanitarias
Por Oskar Viéitez |