2025 | Da vaquilla do Grand Prix ao baile da Peregrina no Casino: as novas máis vistas

A actualidade local, os grandes nomes e tamén as historias humanas marcaron en 2025 o interese dos lectores de PontevedraViva, que volveron demostrar que o pulso informativo da comarca mídese tanto en polémicas como en emoción, denuncia social e celebración.

Un dos temas que máis clics acumulou foi a controversia xurdida tras as badaladas de TVE, cando a humorista LalaChus mostrou unha estampita da vaquilla do Grand Prix. A polémica saltou da televisión á parroquia de Santa María dos Baños de Cuntis, onde o párroco convocou un "acto de desagravio" tras as críticas de colectivos ultracatólicos e da Conferencia Episcopal, considerando a imaxe unha ofensa ao Sagrado Corazón de Xesús.

Entre as novas positivas e de orgullo colectivo destacou a histórica promoción da Escola Naval Militar de Marín, cunha muller como número un por primeira vez. Non só liderou academicamente, senón que ademais foi elixida polos seus compañeiros como a mellor compañeira, un dobre recoñecemento que fixo historia.

A música tamén tivo a súa cota de protagonismo. Juan Luís Guerra foi moi lido tras pedir desculpas publicamente pola suspensión do seu concerto en Sanxenxo, cancelado pola choiva apenas corenta minutos despois de empezar, con máis de 15.000 persoas na Praza do Mar. Días despois, Jennifer López conquistou ao público pontevedrés en Tafisa ante 13.500 espectadores, aínda que os seus fans botaron de menos o tema El anillo e un bis que alargase a noite.

A denuncia social ocupou un lugar destacado no ranking de lecturas. O persoal de limpeza do Edificio Administrativo da Xunta en Pontevedra sacou á luz unha brecha salarial que cualifican de inxusta e ilegal: até 600 euros menos ao mes que compañeiros doutros edificios públicos, a pesar de realizar o mesmo traballo. Unha reivindicación protagonizada maioritariamente por mulleres que xerou un intenso debate.

Tamén espertou gran interese o futuro da antiga conserveira da familia Lafuente en Poio, incluída no plan da Xunta para dar unha "segunda vida" a inmobles costeiros en desuso mediante novos usos compatibles coa contorna natural.

No apartado de sucesos e problemas cotiáns, os lectores seguiron con atención a odisea de centos de galegos atrapados en Tenerife por cancelacións de voos de Vueling; o precinto dunha tapería en Combarro por carecer de licenza; a derriba dunha casa abandonada na rúa Pilar Bértola; ou a violenta pelexa na praza de Barcelos que deixou feridos por arma branca e varios detidos.

Impactaron tamén o incendio dun edificio na rúa Riestra e a protesta ante a Comisaría pola denuncia dun exhibicionista que intimidaba a mulleres, convocada polo Colectivo Transfeminista Fulanas.

Causou gran conmoción, especialmente en Marín, o falecemento en agosto de dous menores naturais da vila que faleceron en incidentes separados relacionados con saltos á auga. Un deles, un mozo de 16 anos, morreu tras permanecer dez días ingresado na UCI. Lanzouse ao río Lérez desde a ponte das Palabras, en Monte Porreiro e foi rescatado inicialmente por un policía fose de servizo tras quedar inconsciente. O mesmo 21 de agosto, un neno de 14 anos morreu tras lanzarse ao mar desde o peirao de Aguete. O menor quedou inconsciente tras o impacto e, a pesar dos intentos de reanimación dos socorristas da praia próxima, non se puido salvar a súa vida.

Non faltaron os temas ambientais, como a crecente preocupación polos tarugos de plástico das bateas que contaminan as praias galegas, nin a curiosidade televisiva con Alberto Chicote gravando en Pontevedra o seu programa Batalla de restaurantes.

O comercio local viviu un ano de cambios. Varios establecementos baixaron a persiana, con especial impacto na rúa Benito Corbal. Entre os peches máis rechamantes, o de Rituals, que puxo fin á súa etapa en xullo de 2025 tras seis anos, e o de Massimo Dutti, cuxo local xa foi ocupado pola perfumería Primor. De fronte ao próximo ano, o sector mira con optimismo ás novas aperturas, impulsadas polo parque comercial do Vao, con Decathlon e Leroy Merlin como grandes locomotoras. Ademais, Mango reforza a súa aposta por Pontevedra cunha nova tenda Mango Teen en Benito Corbal.

Outros negocios tamén viviron un ano convulso en Pontevedra seguido con gran interese pola cidadanía. O Pub Patrimonio viuse obrigado a pechar en marzo tras unha orde municipal amparada no Peprica, unha decisión que avivou o debate sobre a normativa e a crise do lecer nocturno, con duras críticas ao Concello. Pouco despois, o histórico ximnasio Gimsport baixou definitivamente a persiana o 31 de marzo, ao non poder legalizar unhas obras sen licenza, poñendo fin a 38 anos de actividade en San Antoniño. A este escenario sumouse a incerteza da Sala Zennet, no Club Naval, marcada por sucesivas ordes de peche e un pulso administrativo con Portos de Galicia, aínda que o local mantivo a súa programación defendendo un modelo cultural máis amplo que o dunha sala de festas ao uso.

O lado máis social e festivo puxérono clásicos infalibles como a Cea-Baile do Liceo Casino, con 17 mozos presentándose en sociedade, ou o Entroido de Pontevedra, cuxo desfile bateu marcas de participación enchendo a Boa Vila de cor durante máis de catro horas.

E, entre todas estas noticias, houbo espazo para historias que tocan o corazón, como a entrevista a Encarnación e Antonio, a parella desaloxada en Combarro que relatou unha vida marcada pola mala sorte, tras pasar un ano durmindo nunha furgoneta. Ou a historia de David Valqui que o sábado 8 de febreiro saía de Vigo en coche coa súa muller e os seus fillos, dun e 8 anos, cando empezou a caerlle encima do vehículo unha choiva de pedras que danou a súa Audi A4. Quedou sen coche e sen traballo e nin Audasa nin o seu seguro fixéronse responsables